Josephine/Introduction

super alta vectus Attis celeri rate maria

Phrygium ut nemus citato cupide pede tetegit

adiitque opaca silvis redimita loca deae

stimulatus ibi furenti rabie, vagus animis,

devolsit ile acuto sibi pondera silicis.

Itaque ut relicta sensit sibi membra sine viro,

etiam recente terrae sola sanguine maculans,

niveis citata cepit manibus leve tympanum,

tympanum tuom, Cybele, tua, mater initia,

quatiensque terga taurei teneris cava digitis

canere haec suis adorta est tremebunda comitibus.